Friday, December 12, 2008

تعرف بحلم بإيه ؟

تعرف بحلم بإيه ؟
بحلم يجي اليوم اللي الاقيك فيه بتزعق لابننا علشان زعلني
وتقوله انت ازاي تزعلها ؟ انت ماتعرفش هي تعبت قد ايه واتحملت قد ايه ؟
وتقوله ازاي تزعلها وهي بتحبنا قد الدنيا وأكتر ...
ساعتها هنسى أي حاجة زعلتني في حياتي كلها
هنسى كل تعب تعبته في حياتي
هنسى كل لحظة وحشة وهتوه فيك
ومهما كان شكلك وقتها - انا عارفة لما هتكبر هتوحش وانا هحلو ههههه - هشوفك في عيني ملاك
هشوفك راجلي زي ما اتعودت
أماني وحصني .. كل حاجة بحبها وبطمن بيها هلاقيها فيك
ساعتها مش بعيد اجري عليك احضنك وانسى اننا المفروض مركبين الوش الخشب لابننا علشان يحترم نفسه شوية
يااااااااااه قد ايه اللحظة دي بعيدة
بس بلمسها وبعيشها في احلامي كتييييييير

Monday, December 1, 2008

عارف يعني ايه اكون مراتك ؟!



عارف يعني ايه اكون مراتك ؟!



دا مش بس معناه اني
هعيش مع حد اخترته واختارني



مع حد هيستحمل عصبيتي .. تعبي .. فشلي



مع حد هيفرح لكل حاجة حلوة اعملها مهما كانت صغيرة



حد أحس
معاه اني معايا مش مع حد تاني



إني اكون مراتك معناه اني هضمن اني
من حقي أناديك في آخر لحظة من عمري



واطلب منك
تقعد معايا شوية لأني خلاص بموت .. علشان عايزة
اشبع منك



وانت تقولي لأ
ما تقوليش كده



وتزعل مني



وأشوف في عنيك لحظتها كل حاجة حبتها فيك ..
المح خوفك عليا .. حبك ليا .. زعلك مني



وابتسامتك
وانت بتحاول تطمني .. وأفضل باصة لك لحد ما روحي تروح
لربنا



وألمح ملامحي في ملامحك واتطمن .. لأني عارفة اني
هفضل عايشة فيك وبيك



زي ما كنت طول عمري عايشة بيك وليك



ياااااااااه يارب
ما اتحرم من اني أعيش معاك اللحظة دي



يااااارب لما اموت اكون مراتك
ويكون اسمي جنب اسمك لحد ما نتقابل تاني .. في الجنة ان شاء الله


والله بحبك .. بس بستهبل


















برغم انى وافقت على الخطوبة من غير ما يكون في بيننا اى ارتباط

الا انى بعد ما اتخطبنا اكتشفت ان قلبي كان بيحبك من ورايا

او يمكن لما عرفتك اكتر .. لما عرفت احلامك .. لما شوفتك ازاى بتعبر
عن مشاعرك

صدقك مع الناس .. وحتى رخامتك وهزارك


كل يوم عن يوم حبي ليك بيزيد



وكل يوم عن يوم بحسنا بنقرب من بعض اكتر



وكل ما اشوفك بحس انك زعلان منى او ع الاقل قلقان


حاسس اني مش بحبك قد ما بتحبنى

علشان انت دايماً تعبر عن حبك ليا


كتير اوى بتقولى كلام من روعته مش بقدر ارد


وكتير اوى بيبان عليك انك بتحبنى وانت خايف عليا


وانت بتحمينى


وانت قاعد عندنا في البيت وغصب عنك بتسرح فيا

والله انت لو تعرف انا بحبك قد ايه هتفرح اوى


انا بحبك وبفهم معنى كل كلمة وكل تصرف بتتصرفه

وبيبين قد ايه انت بتحبنى لكن بستهبل وبعمل عبيطة

ولو ركزت شوية فى تصرفاتي هتعرف انى بجد بحبك


لو شوفت قد ايه بتوحشني
وقد ايه بتكلم عنك مع اصحابي
ومع اخواتى فى البيت



كل كلمة بتقولها بتدخل قلبي ومش بتطلع



كل حاجة بتقول انك بتحبها غصب عني بلاقيها
حبيبتى



كل حاجة بتكرهها بلاقي حاجة بتنفرني منها



اكيد دا مالوش معنى غير اني فعلاً بحبك



لكن خايفة افتح قلبي



مش خايفة منك ابداً لأ


لكن خايفة ان ربنا يكتب علينا الفراق
لأي سبب



وكل حرف نطقناه يبقى ذكرى - رغم حلاوتها - بتعذبنا



بكرة نتجمع في بيت واحد وصدقنى هبطل
استهبال


:)












Sunday, September 7, 2008

عريس في اليد خير من عريس بعد سنتين


" يا بنتى عريس فى اليد خير من عشرة على الشجرة وياختى دول مش عشرة على الشجرة .. دا واااااحد وبعد سنتين انتى بتفكرى ازاى "

دا كان رأي ماما وتقريباً رأي كل اللى يعرفوا الحكاية .. الكل شايف انى المفروض اقبل العريس الجاهز اللى هياخدنى من ايدى على عش الزوجية فى اقل من شهرين
خاصة وانا مش بحب العريس رقم ( 2 ) ولا في بيننا قصة حب تخلينى اعمل كده
بس انا مش عارفة ليه كنت مرتاحة له اوى
يمكن علشان زميلى فى الشغل ..
يمكن علشان حاسة اننا فاهمين بعض لأننا ياما اتكلمنا واتناقشنا واتخانقنا فى الشغل ؟!!!
مش عارفة بس كل اللى اعرفه انى حاسة انه هو دا اللى انا عايزة اكمل معاه حياتى
الاولانى كويس وكل حاجة لكن .. مافيش بيننا اى حاجة مشتركة
دا زائد انه حاسس بنفسه اوى ويمكن دا العيب الوحيد اللى فيه

يعنى حاسس ومتأكد انه ما يترفضش

بينى وبينكم حسيت انى عايزة اديله درس
وحسيت كمان انى محتاجة السنتين اللى رقم اتنين محتاجهم عقبال ما نتجوز

محتاجة اخطط لحياتى بروقان

ومحتاجة اكبر شوية عن كده

انا حاسة انى لسة طفلة
استخرت ربنا كتيييييييير اوى وبصراحة كنت عاملاها حجة وبتلكع بيها
لأنى عارفة ان الاخ الواثق مستعجل عايز يتم الموضوع قبل ما يسافر
ايوة هو انا ماقولتلكمش .. الاخ هيسافر برة .. ومنمر على هجرة وانا مش مرتاحة لكل دا

رغم انى مش دايبة فى دباديب مصر يعنى لكن بردو ما احبش اسيبها
مستقبلى هنا .. وحياتى هنا واحلامى هنا
اتوكلت على الله ورفضته واصريت على الرفض

ورفضت رقم اتنين بالمرة
ما تستغربوش بصراحة انا عملت عملة

.
.
.
.
اتفقنا انا وهو انه يترفض مع الاولانى الواثق دا علشان فى البيت ما يفتكروش انى رفضت الاولانى علشان خاطره

ولما رفضته رجع بعد شهرين وكان موقفه دا نقطة اقنعت بيها البيت انه حد متمسك بيا وعلشان كده هوافق بقى المرة دى



واخيراااااااااااااااااااااااااا









" شبكنا بدبلته .. وقرينا فتحته .. وعرفنا نيته وغلاوته عندنا "






لووووووووووووووووولوووووووووووووووووووووووولى