Monday, December 7, 2009

ليه مافيش جديد ؟؟


وحشتووووووووووووووووووووني جداً .. 

ناس كتير سألوا على سبب تأخيري كل دا

وليه مافيش بوستات جديدة .. وبجد سؤالكم دا فرحني أوي

الحكاية ومافيها انه احتمال المدونة تتحول لكتاب

طبعاً علشان تكون كتاب مطبوع

لازم يكون في كتير من محتواها ما اتقراش قبل كده

علشان كده انا اضطريت اوقف النشر فــ المدونة

وإن شاء الله تبقى كتاب وتقدروا تقروها كاملة وفــ كل وقت

بس إدعولي لأنه بجد هيفرق معايا أوي

لو اتحقق حلمي وبقت كتاب :)


 


Saturday, October 24, 2009

بحب الدنيا لما تضيق


بحب أوي الدنيا لما تضيق علينا .. لأنها كل ما تضيق كل ما نقرب لبعض أكتر
وبطمن لما تحصل مشكلة في شغلي أو شغلك أو أي مشكلة تحصل لنا ..
وبحمد ربنا على ان نصيبنا من المشاكل بيبقى حوالينا مش بيننا

وبحب أوي احس اني أول حد بيخطر في بالك لما تتضايق والدنيا تتعكر
وبنتهزها فرصة علشان أقولك قد ايه انت انسان عظيم
وانك قد أي مشكلة وقدود .. وبفرح زي الطفلة لما احس انك فكيت شوية
وانك اتفائلت وحسيت بالأمل وبالثقة في نفسك

بحب كمان اننا نقعد سوا نفكر في حل لأي مشكلة
ونجيبها يمين ونجيبها شمال .. لحد ما نلاقيلها حل
وساعتها بقى .. نكافئ نفسنا بخروجة حلوة على الكورنيش قرب الفجر

وبفرح بيك أوي .. كل ما تحصل مشكلة وتقول لي الحمد لله
اشكري ربنا وصلي ركعتين .. مش المشكلة دي احسن من أي حاجة أكبر ؟

بحبك أوي .. وبحب الدنيا لما تضيق علشان انت بتكون ساعتها البراح الوحيد


Saturday, October 3, 2009

وهو يعني ايه الفرق بينك وبين غيرك ؟؟


هو يعني ايه الفرق بين حياتي معاك وبين حياتي مع أي حد تاني ؟؟


ماهو كله جواز .. وكلها حياة .. وكل حياة فيها مشاكل 


دا كلام ياما سمعته زمان 


لما اخترتك انت بالذات اكمل معاك حياتي


لما كنت بعيط وانا بصلي وبدعي ربنا يرزقني بيك زوج واني ما اكملش حياتي غير معاك


عارف الفرق ؟؟


الفرق ان اي حياة من غيرك هي حياة ملهاش طعم 


اي حياة تاني هتبقى " عيشة وخلاص " لكن معاك انا بجد " بعيش


معاك بعيش كل حاجة في حياتي بطعم تاني


حتى النفس اللي بتنفسه ليه طعم تاني


بتنفس معاك كل نفس وانا نفسي اعيش مليون سنة




لكن قبلك  كنت بتنفس واقول 


ياريت دا يكون آخر نفس 


الفرق بينك وبين أي حد تاني اني اخترتك انت 


اخترتك ودا كفاية انه يخليني اتحمل اي حاجة في الدنيا علشان اثبت ان اختياري كان صح 



الفرق ان حتى خناقنا بيبقى بحب 


بنبقى بنتخانق واحنا خايفين على بعض

خايفين على احساس بعض وماحدش فينا بيجرح في التاني 

الفرق بينك وبين أي حد تاني .. ان احلامنا واحدة 

وحتى لو انا بحلم بحاجة خاصة بيا انا انت بتحب احلامي وبتحضنها 

وبتحاول تساعدني احققها .. رغم انك مش هتستفيد أي حاجة


انت بس عايزيني مبسوطة


مش زي أي حد تاني .. ماشي في طريق وانا في طريق تاني خالص


الفرق بينك وبين أي حد تاني انك انت الوحيد في الكون بحاله اللي بتفهمني من غير كلام 

 وبتحس بيا لو حتى انا في اخر الكون وانت في الطرف التاني منه




الفرق بينك وبين أي حد تاني .. اني مخلوقة من ضلعك انت


واني حتة منك انت ..  جزء من روحك


علشان كده انت الوحيد اللي ينفع تكملني .. مش أي حد تاني




شوف حل بقى .. كده مش نافع


بجد كده مش نافع


وصلت في حبك لدرجة اني مش شايفة في الدنيا غيرك


كل الدنيا عندي انت ..


كل حاجة حلوة اشوفها عايزاها تبقى بس ليك


كل زمايلي في الشغل بتلغبط واناديهم باسمك


وطول ما انا قاعدة لوحدي .. بحس انك معايا وبنسى وبكلمك


وبعدين افتكر انك لسة ما جيتش


او اني في الشغل وانك مش معايا


وما بقيتش اعرف اكل الا معاك ..


ولا اتفرج على التليفزيون الا معاك


ما بستمتعش بالشاي بتاعي الا على ريحة قهوتك


وبقيت بغير عليك لدرجة مرضية


انت عارف ؟


اسمك على موبايلي بفضل اغير فيه




لحد ما يبقى بعيد عن اسم اي بنت


بغير من كل حاجة تشوفها وتعجبك


وما اكونش انا اللي عملتها


يالهوي .. انا شكلي بقيت مجنونة بيييييك


لأ دا أنا مش شكلي اتجننت ....


دا اكييييييييييييييد

Saturday, September 19, 2009

العيد ما جاش


العيد ما جاش .. ايوة طبعاً ماجاش


لأنه ما مشيش اصلاً من يوم ما بقينا سوا


كل يوم معاك عيد بالنسبة لي


كفاية ان اول حد بشوفه كل يوم الصبح هو انت 


وآخر حد بشوفه وبسمعه بالليل هو انت 


دا لوحده عيد 


دا غير اني كل يوم باكل معاك وبدردش معاك 


وبنهزر سوا ... وحتى لما بتنخانق او لما نرخم على بعض 


بردو بتبقى عيد 


بس تصدق .. العيد بردو ليه طعم مختلف 

الفرحة معاك طعمها مختلف .. اول مرة اتمنى اني اقضي العيد كله في البيت


ولما اخرج من البيت ابقى عايزة ارجع بسرررررررررررعة اوي علشان وحشني البيت


وحشني اكون معاك ونهزر مع بعض على راحتنا


وحشني نلعب زي الأطفال


نخطف من بعض السوداني واللب والترمس 


نقعد نلعب سوا بلاي ستيشن واللي يتغلب يعمل للتاني شاي :)


نقعد في البلكونة نتفرج على الشوارع وهي مليانة فرحة ونور 


ونقعد نعاكس في ولاد الجيران الصغيرين من البلكونة


يااااااااااااااه تصدق العيد حلو أوي :)


كل سنة وانت زوجي

كل سنة وانت حبيبي

كل سنة وانت عيدي :)

Sunday, September 13, 2009

ممكن تحكي لي حدوتة ؟؟


بموت فيك وانت بتحكي لي حدوتة .. من اول نظرة عينك اللي بتقول 

" مجنونة بس بحبك "

لحد طريقتك وانت بتقول لي توتة توتة :)

بحب اوي الحواديت العجيبة اللي بتقعد تألفها 

وبحب اتلامض معاك وانت بتحكيها .. لحد ما احس انك خلاص هتزهق بقى 

فأسكت كأني تلميذة في ابتدائي قاعدة قدام استاذها

فاصعب عليك فتهزر وتخليني اكمل لماضة :)

بحب أوي اسمع منك حواديت .. علشان بحب احس اني بنتك
عارف ليه ؟؟

علشان احس اني عمري ما عشت قبلك ، وان كل عمري من أول ما اتولدت كان معاك


و كمان علشان بحب اسمعك وما اتكلمش  

واراقبك وانت بتتكلم .. واخزن في دماغي مليوووون ألبوم فيه صور ليك 

وكمان بحب أوي اشوفك وانت محتاس ومش عارف تفكر في نهاية للحدوتة .. ونقعد نفبركها سوا 

وبس ياسيدي .. ممكن بقى تحكي لي حدوتة  ؟؟

Thursday, September 10, 2009

لذة طاعتك


تعرف اني قبل ما اعرفك كان عندي الموت أهون من اني اقول حاضر ؟

آه والله ، والف وادور حوالين أي حاجة أي حد يقولهالي

علشان احسس نفسي اني بعملها من دماغي مش بسمع كلامه

لكن معاك .. بقيت بستمتع بجد بإني اسمع كلامك ..

عارف لما تبقى حاسس بلذة وانت بتسجد لربنا وبتطيعه ؟؟


انا بحس كده .. بفرح اوي لما احسك راضي عن حاجة عملتها او فرحان بيها


بفرح اوي لما تطلب مني أي حاجة .. لو حتى كوباية ماية ..

بفرح لما تطلب مني أساعدك في شغلك ، او اعمل حاجة فيه بدالك


و ياسلاااااااااااام بقى لما اقترح عليك اقتراح وتعمل بيه


حتى لو كان حاجة صغيرة .. ياااااااااااااااه ببقى هطير في السما م الفرحة


طب انت فاكر لما اقترحت عليك لون معين للبدلة والجرافتة يوم فرح اخوك واشتريتهم فعلاً ؟؟


ياااااااااااااااه كنت مظأطاة اووووووووووي
وكنت حاسة قد ايه انت واثق في ذوقي
وقد ايه حابب تسعدني واني اشوفك زي ما بحب


****


تعرف .. انا بدعي ربنا دايماً اني اموت وانا مراتك


واموت وانت راضي عني


وياااااااااارب ربنا يحققهالي ياااارب


Monday, August 24, 2009

أنا ... وحماتي




انا عارفة م الأول ان مامتك مش بتحبني .. انت ما قولتش حاجة

بس تصرفاتها كانت واضحة .. ولما سألتك

اكتر من مرة .. انكرت

بس لما قولتلك
عيني في عينك كده

اعترررررفت

وعرفت انها مش بتحبني علشان انا اختيارك .. وعلشان انت رفضت كل عروضها بالعرايس

اللي -
من وجهة نظرها - احسن مني مليون مرة

وآخرهم البت جارتكم دي اللي طول عمرها بترسم عليك




ورغم ان الوضع دا مقلق اوي وكان مخوفني .. بس بردو كان مطمني انك بتحبني بجد

وانك انسان عاقل ومش بتصدق أي كلام

بس كان نفسي اوي احس انها راضية عني

لأن احساسي برفضها ليا كان جارح كرامتي اوي

وعلشان كده قعدت افكر ، وافكر ... وافكر

وقررت في الآخر

إني أعلن عليها

.
.
.
.
.
.

الحـــــــــــب

وعلى رأي الحكمة اللي بتقول

"
لا رد على الابتسامة الا بالابتسامة "

قررت اكون معاها حبوبة وذوق وبشوشة جداً ..

حتى لو انا متعصبة او تعبانة بردو معاها ابقى حاجة تانية

وعرفت منك عيد ميلادها وكل مناسبة بتعتز بيها في حياتها

وكنت دايماً اكون اول حد يهنيها بالمناسبة دي

وحسستها اني مبهووووورة بيها اوي

و استغليت نقطة ان مافيش حد بيقدر يقاوم اغراء الكلام عن نفسه

و لأنها كانت بتتجنب تتكلم معايا وبتكلمني من غير نفس

بدأت اكلمها عنها ، واحسسها اني مبهورة بخبرتها ف الحياة

واسلوبها في التربية واسلوبها في تنظيم بيتها

وحتى اسلوبها في اللبس و عمل الأكل وكل حاجة

ودايماً اتصل بيها استشيرها في حاجات كتير

مش لازم اعمل باللي تقول لي عليه .. بس كنت بحسسها اني بثق في رأيها

فبقت طبعاً تتكلم معايا بكل حماس وفخر وتبقى مبسوطة لما تكلمني

مش كده وبس .. دا بعد فترة لما تلاقيني بقالي كتير ما روحتلهاش علشان مشغولة او كده

تسأل عليا وتطلب انها تشوفني

علشان عايزة تكلمني

بس في نفس الوقت .. كنت حريصة اوي في كلامي معاها

يعني مثلاً ما كنتش اكدب عليها علشان اجاملها .. لأني عارفة انها هتبقى متأكدة اني بكدب

فهتاخد عني انطباع اني منافقة

وانا ما حبيتش كده

*****

عارف انا افتكرت كل دا ليه دلوقتي ؟؟


مامتك لسة قافلة معايا التليفون حالاً

كانت بتقول لي اني وحشتها أوي ، وبتقول لي انها حلمت لي حلم حلو أوي

وبتقول لي يارب يتحقق علشان انا استاهل كل خير ;)




Friday, August 21, 2009

تعرف اني عاملة لك عمل ؟ !!



تعرف اني عاملة لك عمل ؟؟

أيوة طبعاً اومال يعني انت هتحبني الحب دا كله بالساهل !!

انا كل اول شهر باخد مبلغ معين كده واديه للشيخ بتاع الجامع اللي ورانا ...


علشان يطلعه صدقة بنية دوام سعادتنا :)


وباخد أي حاجة فيها عرقك (( قَطَرك يعني )) ..


واغسلها واكويها وارجعهالك معطرة :)



و وانا بعمل لك الأكل بقعد اقرا عليه شوية كلام ..

أيووووووون .. بقعد اقول يااااااااارب يطلع حلو علشان هو تعبان طول النهار في شغله و جعان

ونفسي أوي ابسطه :)

وبحط لك في هدومك حجاب .. مش حجاب واحد لأ كتييييييير

علشان كل ما تيجي تطلع حاجة من جيبك تلاقي ورقة بقولك فيها

" بحبك " أو " وحشتني " أو " خلي بالك منك .. انا ماليش غيرك "

وكل يوم قبل ما تخرج بقعد اقرا أدعية في سري

واستودعك وادعي ربنا يحرسك ويحميك

بذمتك مش عَمل جامد وما يخرش الماية

واحسن من بتاع ام حزمبل واشتاتا أشتوت ؟؟

:)


لأ وايه .. احلى حاجة في العمل دا

ا
نك كل ما تصلي وتتوضا و نقرا قرآن سوا العمل مفعوله يزيد

مش يبطل ..

:)

Wednesday, August 12, 2009

يوم عيد ميلادنا :)




كانت فكرة مجنونة أووووي اننا نحتفل بعيد ميلادنا في

يوم اول مرة اتقابلنا فيها

رغم انها بجد فكرة منطقية جداً .. احنا اتولدنا فعلاً يوم ما شوفنا بعض

انا حبيت الفكرة وصدقتها لدرجة اني لما حد بيسألني عن عيد ميلادي

بقول

24/6

تلقائياً كده :)

ألذ حاجة بقى يوميها التفانين

اللي كل واحد فينا بيعملها من ورا التاني علشان الاحتفال دا


أول عيد ميلاد لينا سوا

اخدتني في أكتر مكان بحبه في حياتي ..

كان حلم حياتي بس اني اعدي من قدامه

اخدتني بالعربية وغميت عيوني ، ولحد ما وصلنا ودخلنا وانت مغمي عيني

حتى اضطريت البس نضارة شمس كبييييييييييييييرة

علشان الناس ما تقولش علينا مجانين

ودخلنا .. وقعدتني

وانا هموت واعرف انا فين

لحد ما جه الجارسون


وقال " منورين كافيه ريش يا افندم "

" وااااااااااااااااااااااااااااااااااااااااااااااااااو ريش بجد ؟؟!! انا بقالي سنيييييييييييين بحلم اشوفه واعرفه بحبه اووووووووي وانت كمان بتحبه بس بجد ما تخيلتش ان دي مفاجئتك "

ما قدرتش امسك نفسي وقولت كــــــــــل دا قدام الجرسون

بقى فطسان م الضحك علينا

وانت اتكسفت اووووووووووووي لما قولتلك

بصوت عالي وقدام الجرسون والناس سمعاني


" بجد بجد بموووووووووووت فيك "

وكل دا ومفجآتك ما خلصتش

بعد ما شربت قهوتك وانا شربت شايي على ريحة قهوتك ... اخدتني واتمشينا على الكورنيش

وكمان ركبتني مركب .. واكلنا درة وترمس

خليتني عملت في ليلة واحدة كل اللي حلمت بيه طول عمري

وبعد ما روحنا البيت


لقيت مفجأة كمان

" تورتة عليها صورتك وصورتي " وشكلها قلب جميييييييييييل اووووووووووووي

كانت من حلاوة شكلها مش عايزة اكلها عايزة اتفرج بس عليها ههههههههههه

وبعدين .. طلعت لي آخر مفجأة واروع مفجآة

أكتر ديوان بحبه لأمل دنقل

لأ ومش كده وبس

دا مكتوب بخط ايدك .. وانا عارفة انت قد ايه بتكره تكتب بايدك

لكن علشان خاطري عملته ليا

ومجلده وعلى التجليد طابع اهداء بلون الدهب

" إلى حبيبتي وطفلتي وصديقتي ومعشوقتي الأبدية إليكِ يا زوجتي الحبيبة .. "


ومن جوة كتبت لي اهداء بردو بخط ايدك

" حبيت امل دنقل مليووووووون مرة اكتر من الأول علشان كان اول حاجة نلاحظ انها متشابهة بيننا فكان لازم النهاردة اهديكي كلماته .. انتي عارفة اني مش بعرف اكتب شعر لكن انتي قصيدتي الوحيدة "

انا قدام دا كله ماكنتش عارفة اتكلم انا بس عيطت اوووووووي

وحضنتك كأني مش عايزة نبعد عن بعض سنتيمتر واحد حتى طوووووووول العمر


*****

وجه الدور عليا بقى علشان اوريك المفجأة بتاعتي رغم ان الساعة كانت 3 بالليل ورغم اننا كنا خلاااااااااااااااص مهدودين من التنطيط طول النهار
قولت لك :

* يلا بينا ننزل حالاً ..

- طب ننزل فيين ؟؟

* هتعرف لما تنزل

- طيب خليها الصبح يا سارة

* لا يمــــــــــــكن أبداً لازم حالاً

- طب انا مش قادر اسوق

* مش محتاجين العربية هنتمشى خمس دقايق ونوصل على طول

- لأ نمشي اييييييه .. اسوق احسن


***

ونزلنا ركبنا العربية وقولتلك اطلع على الشارع الرئيسي

وطلعنا على الشارع الرئيسي وخليتك تركن على جنب

وجه دورك بقى ، غميتك زي ما عملت فيا الصبح بالظبط

ووقفنا وشيلت الغطا من على عينك وشاورتلك على اعلان كبير منور ...

الاعلان كان عليه صورتك وكان بيقول


" بحبـــــــــــــــــــــك يا جوزي "

أي نعم في ناس افتكرته فيلم

وفي ناس افتكرته اعلان تمهيدي لاعلان عن سمنة هههههههه

والناس اللي نفذولي الاعلان دا كانوا فاكريني مجنونة هههههههههههه


بس عجبك اوووووووووووووووووي

وكل يوم الصبح وانت رايح شغلك تشوفه

ووانت راجع تشوفه

وكل الدنيا مش فاهمة اي حاجة .. انا وانت وبس

اللي فاهمين ;)


******

Saturday, August 8, 2009

الفرق بين أول وتاني شخطة




أول مرة تشخط فيا فرحت اووووووووووووي

لأسباب كتيرة أولها انك شخطت فيها واتنرفزت علشان كنت قلقان عليا

فحسيت قد ايه انت بتحبني بجد

وتاني سبب علشان حسيت اننا خلاص مابقاش بيننا فرق

مابقيتش تتعامل معايا بقى بأسلوب المخطوبين واللي هو رقة ومش عارف ايه ههههههههههه

تالت سبب علشان انا كان نفسي اشوفك وانت بتشخط علشان ما اتخضش منك بعد كده


لكن تاني مرة لما شخطت فيا :(

زعلت اوي وعيطت .. مش زعلت منك

انا اصلاً ما بعرفش ازعل منك
لكن ...

زعلت من الشخطة ، حسيت اني ما بقتش أميرتك
مافيش حد بيشخط في اميرته :(

وكمان زعلت علشان ماكنش ليا ذنب

انا عارفة ومقدرة انك تعبان ومتضايق وعليك ضغوط كتيرة لكن ....

كان نفسي تبقى زيي
لما اتضايق او الدنيا تخنقني اوي اجري عليك واعيط لك واقولك شوفت حصل لي ايه ؟؟

انا لو زعلانة من الدنيا كلها مجرد ما اسمع صوتك او اشوفك بهدى وبتطمن ومش بقدر اكشر


بس يا سيدي .. دا الفرق بين اول شخطة

وتاني وآخر شخطة زي ما وعدتني

وانا مصدقاك ... مش علشان بحبك بس

لأ علشان انا واثقة اني مش ههون عليك


وواثقة اني هفضل طول عمري في نظرك اميرتك وحبيبتك

لو حتى فات على جوازنا مليووووووووون سنة

Wednesday, August 5, 2009

زينة رمضان




عارف كان بقالي كام سنة ما عملتش زينة رمضان ؟؟؟

من ايام لما كنت في رابعة ابتدائي

كانت آخر مرة اعمل فيها زينة رمضان

كنت نسيت اساساً ان حاجة زي كده بتتعمل

كنت نسيت الجو دا بتاع النشا اللي نعملها صمغ وكتب المدرسة والحاجات دي

بس ما تتخيلش قد ايه كنت مظأطة وفرحاااااااااااااانة لما لقيتك جاي من برة وجايب معاك حاجات الزينة


وجايب 3 فوانيس

فانوس ليا وفانوس ليك وفانوس لابننا او بنتنا اللي لسة ماجاش

حسيت كأني رجعت طفلة .. وعشت بجد فرحة رمضان

كان شكلنا مسخررررررررررة واحنا مدفوسين وسط اكوام ورق الزينة المتقطع

واحنا بنحاول نفتكر كنا بنعملها ازاي واحنا صغيرين


واول فانوس ورق عملتهولي وكتبنا عليه اسمنا

ياااااااااه شكله كان رووووووووعة .. زعلت اوي لما الهوا طيره م البلكونة

كان نفسي احتفظ بيه اووووووي

بعد ما خلصنا مشروع الزينة اللي نجح بالعافية حبيت اعيش معاك طفولتي بجد

روحت جبت نشا وعملتها صمغ

وجبت مجلات وعملنا فرع زينة صغنن شبه اللي كنا بنعمله واحنا صغيرين

وعلقنا الزينة زي المجانين في البلكونة .. ههههههههه فاكر لما الجيران كانوا بيبصوا لنا شرزاً كده هههههههههه

تاني يوم بدأوا شقة ورا التانية يعلقوا الزينة واحنا فطسانين من الضحك عليهم

لما هم عايزين يعملوا كده بيكابروا ليييييييييييييييه ؟؟


كل سنة وانت طيب يا احلى حد في حياتي

كل سنة وانت طيب يا هدية ليلة القدر :)

رمضان كريم

Saturday, July 25, 2009

اسمعووووووووووووووني ع الراديون





اسمعوني ع الراديو دا

ايون دا افعص هنا كده

كل يوم جمعة واثنين وبرنامج جننيه تكسبيه

مؤامرة نسائية على قلب وعقل وعيون آدم :)

تهمني آرائكم جداً خاصة .. مامة مازن :)

أول حلقة كانت امبارح وهتتعاد تاني النهاردة ان شاء الله

Sunday, July 19, 2009

فاكر أول مرة ؟؟




فاكر اول مرة دخلت بيتنا دا ؟؟


كنت متخيلة اني مش هتعود عليه إلا بعد وقت كتير

بس بمجرد ما دخلته حسيت اني زي ما اكون عشت فيه عمري كله

مرتاحة أوي ، ومطمنة أوي ، فرحااااااااااااااااااااااااااااااااانة أوي






طب فاكر أول مرة صليت بيا الفجر ؟؟

يااااااااااااااااااه يومها عيطت اووووووووووووي ،

عيطت لما اكتشفت اني نسيت ولسة بدعي ربنا

" يارب اجمعني بيه في بيت واحد .. يارب اسعدني بيه وعوضني عن كل حاجة وحشة شوفتها في حياتي اللهم ان في قلبي مضغة تهفو إلى عبدك هذا فاجمع بيننا في الخير "

وفوقت وانت بتقول

" الله أكــــــــــــبر " .. فوقت على صوتك ، على ان ربنا استجاب لي

وحسيت كأني عمري ما صليت صلاة بخشوع واطمئنان قد المرة دي



فاكر كمان أول مرة قرأنا قرآن سوا ؟؟

صوتك كان حلو أوووووووووووووي ، و وشك كان كله نور

ساعتها حمدت ربنا إني اخترتك أب لولادي :)



طيب فاكر أول مرة غطيتني فيها ؟؟

لما انا نمت وانا بتفرج على التليفزيونوحاولت تصحيني ما صحيتش

فغطيتني وقعدت تجيب لي غطيان من كل حتة في الشقة

علشان خايف عليا م البرد اوي

بصراحة انا يومها ما كنتش نمت ، بس كان نفسي أوي احس الاحساس دا

احس كأني بنتك اللي بتغطيها بالليل وخايف عليها

وكنت مش عارفة اقولك ازاي كده

فعملت نفسي نمت علشان تعمل كده

عارف ساعتها كان نفسي اووووووووووي أقولك

" بحبك "



أكيييييييييييد بقى فاكر أول مرة عملت لك بإيدي أكل ... مش قادرة اوصف لك احساسي يوميها

انت عارفني بكره المطبخ اووووووي بس لما اكون واقفة في مطبخي

وبعمل أكل ليك انت .. حاجة تانية خالص

كنت حاسة زي ما اكون بعمل عمل وطني هههههههههههههه

وفضلت كل شوية رايحة جاية ع البلكونة اشوفك جيت ولا لسة

ومش عايزة اتصل بيك علشان ما تعرفش المفجأة

وياسلاااااااااااااااااااااام بقى لما جيت ودوقته وقولت لي انه حلو

كنت حاسة اني بحبني اوووووووي علشان عملت حاجة عجبتك

ألا صحيح قول لي ، هو عجبك بجد ولا كنت بتفرحني ؟؟



ياترى فاكر أول شهر تقبض مرتبك ونقعد سوا نشوف هنمشي ازاي وهنشتري ايه

ونحوش كام ولما اكتشفنا ان فاضل للترفيه خمسة جنيه بس ؟؟

ساعتها انت اتضايقت بس انا فرحت اووووووووووي

الخمسة جنيه دول هيكفونا اكيد نتمشى ع الكورنيش في عز الليل

ومش هيدخلونا سينما زي ما كنت انت عايز

لأني عايزة اكون معاك انت وبس

وعايزة اسمعك ونتكلم مش نقعد ساكتين نتفرج ع فيلم



فاكر اول ما عرفت اني حامل كنت عامل ازاي ؟؟

كنت عامل زي الطفل مزأطط وخايف وكنت بصعب عليك اوي كل ما اقول اه

وكنت بتخاف عليا بجد .. عليا انا مش على ابننا وبس

فرحت أوي ساعتها وحسيت اني لسة " حبيبتك " مش مجرد مراتك وام ولادك

ولا يوم ولادتي كنت هتتجنن وانا قعدت احاول اكتم صوتي علشان ما تتخضش

بس انت كنت حاسس بيا .. ساعتها بصراحة ما خطرش في بالي اقولك بحبك

لأني كنت بتألم اوي :)



فاكر اول مرة شيلنا ابننا ؟؟ انا كنت مرعووووووووبة وخايفة عليه اوي
وحاسة انه صغنن خالص وخايفة اكون بوجعه
بس بعد شوية بدأت اطمن وكنت بفرح اوي لما يقعد يعيط واول ما احضنه يسكت

وانت اول مرة تشيله كان شكلك يفطس من الضحك
كنت محتاااااااااااااس خالص ومش عارف تعمل ايه
هي دي معاناه الطفل يا عيني لما يكون مامته وباباه الاتنين
آخر العنقود هههههههههههه



الله .. كل دي حاجات حلوة واحاسيس حلوة

أول مرة احسها واعيشها كان معاك .. ومافيش حد غيرك قدر يخليني اتمتع بيها

كل دا زاد ربنا بيديهولنا علشان نتحمل قسوة الايام

ولو ان مافيش حاجة في الدنيا دي تقدر تقسى عليا وانا معاك

بحبك أوي ، بحب عفويتك اللي خلت لكل الحاجات دي طعم تاني

بحبك أوي وبحب صدقك اللي مخليني دايماً مطمنة

بحب كل لحظة حلوة ومرة عشناها وعايشينها وهنعيشها

علشان معاك

ربنا يخليك ليا :)

Sunday, July 5, 2009

إسمع دي كده ..

غرامك من زمان فيا .. كلامك كله حنيه .. لاقيتنى بسرعة خدت عليك ..
وجودك جنبى خلانى اشوف الدنيا لون تانى وضحكتلى الحياه ف عنيك ..

نسيت الناس معاك انت .. حبيبى الدنيا وانا جنبك عليا تهون ..
بقينا خلاص انا وانت لبعض ومستحيل البعد بينا يكون..

سنين من عمرنا فاتو .. محسش قلبى دقاته غير اللحظة اللى فيها لاقاك ..
حياتى بقالها بيك معنى اخيرا ربنا جمعنا وجه الوقت اللى هبقى معاك ..

نسيت الناس معاك انت .. حبيبى الدنيا وانا جنبك عليا تهون ..
بقينا خلاص انا وانت لبعض ومستحيل البعد بينا يكون ..




دي أغنية لحسام حبيب ، اسمها نسيت الناس

حسيت ماحدش يستاهلها غيرك

لو أقدر اخطفها من عند كل الناس واخليها معاك بس

هعملها :)


Tuesday, June 30, 2009

بحاول اتعود ..

بحاول اتعود على حبك اللي في شكل أفعال وتصرفات مش كلام .. في شكل عطاء وما بتحاولش أبداً تقول بعمل كذا عشانك
حبك اللي مش مستني قصاده مقابل
بس بردو بحاول المح وسط مشاغلك وتعبك والمشاكل اللي حوالينا حبيبي اللي بيحبني بروقان
بحاول المح فيك حبيبي لما كان باله رايق ومش شايل هم
وبفضل انكشك بالكلام والهزار لحد ما اخليك تطلع الطفل اللي مخبيه من جواه
وأول ما المحه .. اهدى واتطمن
صدقني انا دلوقتي بحبك اضعاف اضعاف زمان
دلوقتي الذكريات الحلوة بيننا أكتر .. والأيام الاحلى اكتر
والحب كل يوم بيننا بيكبر
وحابة فيك تحملك للمسؤلية وتفكيرك في بكرة
بكرة بتاعنا .. وعارفة ان جزء كبير أوي من همك هو همي وهم بيتنا وأولادنا ..
لكن حبي ليك بيخليني اخلق ليك في خيالي صورة عاشق خرافي
بجمع بينك زمان ودلوقتي علشان احبك أكتر واكتر
صدقني انا بحبك في كل الحالات
بحبك وانت رومانسي ولما تكون عملي .. بحبك وانت خياي ووانت واقعي
بحبك وانت مشغول ووانت رايق بحبك لما تقولي بحبك وبحبك بردو لما تقولها بخوفك عليا

Friday, June 19, 2009

لما لقيتك

لما لقيتك عرفت يعني إيه " وحشتني " ويعني إيه

" محتاجة اشوفك " ويعني إيه " ب ح ب ك "

يعني إيه اتولد في كل مرة ابص فيها في عينيك

عرفت ازاي ممكن اكون مستعدة أدفع لك عمري بجد ..

عرفت ان الحب الحاجة الوحيدة اللي ممكن تخليني ادعي ربنا ياخد من عمري ويديلك ..

وادعي ربنا يخفف عنك ويبتليني .. ولو لازم حد فينا يتألم يبقى انا وهبقى مبسوطة

عرفت ازاي لما افرح انت اول حد يخطر في بالي ولما الدنيا تضيق في وشي انت تبقى البراح

فهمت ازاي الحب بيخلي العشاق مجانين وأطفال وكمان بيخليهم ز ي الأنبياء .. قلبهم ابيض وجواهم غفران وتسامح للكون كله

عرفت طعم ومعنى الدنيا والضحكة والفرحة والشوق والوحشة والوجع .. عرفت معنى الخوف والأمان

والحب اللي بجد

كل دا حصل لي لما لقيتك .. لأني عمري ما حبيت بجد إلا لما لقيتك

ربنا ما يحرمني منك

Saturday, June 13, 2009

الباشا تلميذ ;)

فرحت أوووووووووووي لما جيت تاخد رأيي في انك عايز تقدم في كلية الاعلام في الجامعة المفتوحة

فرحت لأسباب كتيرة .. أولها إنك هتحقق حلمك اللي من زمااااااان كان نفسك تحققه بس الظروف خليتك تروح في اتجاه تاني

وفرحت لأني حسيت الحاجات المشتركة بيننا بتزيد .. وفرحت كمان علشان دا هيخليني أعيش معاك احساس من زمان

نفسي أعيشه .. هحس اني مامتك كده وبخلي بالي من مذاكرتك ، وادخل عليك وانت سهران تذاكر ياعيني بسندويتشين

ونسكافيه ولا قهوة أو شاي .. وأقعد ادعيلك ..

وكمان لأني درست الحاجات دي قبلك فممكن أوي اساعدك في مذاكرتك .. يعني هحس بجد كأن ماجد نط في العمر

وبقى في الجامعة .

وآخر سبب بقى سبب - أعترف وأقر - إنه سبب شرير .. بصراحة هبقى فرحانة فيك وانا فاضية ومش ورايا

مذاكرة وانت بقى ياعينيييييييييييييي عندك امتحانات .. وارخم عليك بقى واقولك التليفزيون ممنوع لحد ما تخلص مذاكرة

هههههههههههه



Monday, June 8, 2009

هتطلقني ؟؟!!

من كام يوم وانا كل شوية تتحكي قدامي حكاية واحدة جوزها طلقها من كتر الغيرة
وشوفت فيلم عربي بتاع نجلاء فتحي وحسن يوسف النهاردة لما كانت نجلاء فتحي مبهدلاااااااااااااااه بالغيرة
وكملت بمكالمة في اسامة منير واحدة اتطلقت بعد جوازها بــ 6 شهور بسبب الغيرة
فحاسة انها رسايل ربنا بيبعتها لي علشان الم نفسي شوية وابطل اغير عليك بالشكل المرضي دا
و الله بحااااااااااااااااااول .. بحاول استعبط على نفسي واقنع نفسي ان الستات مش هتاكلك يعني
بس مش قادرة
بس سيبك من دا كله .. هو انت بجد ممكن تطلقني ؟؟
أياً كان السبب ممكن بعد ما روحنا طلعت علشان نتجوز ونعمل البيت دا نتطلق ؟؟
ببساطة كده !! المصيبة اني قريت في كتاب شكلها باظت لعمر طاهر ان الطلاق بالنسبة للاتنين المتجوزين عن حب
عبارة عن شكل جديد من اشكال الحب وممكن يحصل
انا مش متخيلة ان مهما حصل ممكن تفرط فيا
مش متخيلة انك بكل بساطة تقول لي انتي طالق
وكأنك بتقول لي ببساطة انا مش عايزك ولا عايز بيتنا ولا عايز مسك و ماجد ولا عايز اكمل عمري معاكي
وكمان مش عايز تبقى ليا في الجنة وبكل بساطة متصور انك تكوني مرات حد غيري وتعيشي معاه الاحلام اللي حلمناها سوا
بأحفادنا وببيتنا لما نعجز والحب اللي العالم كله هيحلف بيه
بجد مش متصورة ان دا ممكن يحصل
وعلشان كده كنت هصحيك من النوم اقولك انت ممكن تطلقني ؟؟
بس افتكرت .. انت مسافر في شغل ومش جنبي
فمسكت التليفون ولسة هطلبك بعدين افتكرت ان الساعة دلوقتي 3 الفجر
وافتكرت ان دا بالظبط اللي حصل للي اتطلقت بعد جوازها بــ 6 شهور
فلميت نفسي بصراحة :D

Thursday, May 28, 2009

شكراً لأنك رجلي


من الرائع أن تشعر المرأة أن لها رجل ما .. رجل تستطيع أن تلجأ إليه إذا ضاقت بها الدنيا

رجل تثق بأنه لن يقابل شكواها بالضجر أو بالتشفي أو القسوة ...

لكن الأروع من كل هذا أن يكون هو بنفسه اختار أن يكون هذا الرجل

اختار بكل حب أن يكون ملاذها .. حصنها وأمانها ..


ملاذي الحبيب وحصني الذي لم أشعر قبله بأمان ..

أشكرك .. أشكرك لأنك اخترت أن تكون هذا الرجل

أشكرك لأنك دائما هنا .. في الجزء المشرق في حياتي تمنحني الضوء في أكثر ليالي حياتي عتمة

وتمنحني الدفء حين يشتد السقيع

شكراً لأنك تتحملني بكل الحب .. بكل الرضا .. وكل الحنان

زوجي الحبيب .. شكراً

Saturday, May 23, 2009

سلطة خضرا


بمووووووت في عمايل السلطة زي ما انت بتموت في أكلها
وبحب اعملها في بيتنا وبس وبحب اعملها وانت معايا وبس
لما بعملها من غيرك ما بيبقاش ليها طعم
بتبقى مجرد سلطة

لكن وياك بتبقى .. سلطة وفرحة وهزار وضحك وشقاوة وطفولة ودلع وكل حاجة حلوة فيك وفيا
بحبك اوي لما تيجي تعمل تسلل وتخطف مني خيارة ولا ورقة خس
ولا لما اقرر اكافأك وأكلك انا بإيدي حتة جزرة ولا أوطة
وبحبك وانت بتتتريأ عليا وانا بعيط من البصل

و علشان كده لزقت على حيطان المطبخ كل الصور اللي صورتهاني وانا بسسسح من البصل
و معاهم صورك لما تعطفت عليا سموك وقررت تعمله بدالي
بحب كمان اخطف منك اللي خطفته من طبق السلطة ونلف ورا بعض الشقة كلها زي العيال

ولا شكلك وانت هتموووووت مستعجل ع الأكل وانا بتدلع وانا بعمل السلطة علشان عايزة رشوة ;) أو علشان بعاقبك
وبحبك اوووووووووي وانت بتصالحني لو زعلانة وتقول لي
" ما تيجي نعمل سلطة "







Thursday, May 21, 2009

عندي ثقة فيك


عارفة انك مخنوق من غيرتي وبتتضايق منها
وكذا مرة لمحت لي إني المفروض أثق فيك
وانا والله بثق فيك .. لو مش بثق فيك مش هحط عمري بين ايديك
لكن .. بصراحة ماعرفش ليه عفريت بيركبني لو شوفت أي بنت او ست بتكلمك
مهما كانت قد ولادك ولا قد مامتك ولا من سننا .. بحس اني من كتر حبي فيك عايزة اخبيك عن كل العالم
علشان عارفة قد ايه انت حد روعة وممكن أوي أي حد يحبك
وانا واثقة فيك لكن ماحبش حد يحبك ولا يبقى مجنون بيك غيري
واثقة فيك بس مش بحب حد غيري يكون حلو في عينك ولو للحظة
واثقة فيك لكن احب اني اكون انا اقرب واحدة لقلبك كزوجة وحبيبة وصديقة
انا اساساً بغير عليك حتى من اصحابك الرجالة لو حسيتهم هيقربوا ليك اكتر مني
والله بحاول اكتم وما ابينش
وبحاول ما اخنقكش
والله بداري في قلبي غيرة اضعاااااااااااااااف اللي ببينها ليك
وصدقني لو غيرتي بتعذبك  مرة انا بتعذبني ألف مليون مرة .. بس م بقدرش
غصب عني بغير عليك

Tuesday, May 5, 2009

مافيش أولاد ؟!!


حياتنا مش ناقصها اطفال .. انا حاسة انك ابويا وابني واخويا وصاحبي وكل حاجة
مش ناقصني في الدنيا دي حد ولا حاجة
وانت كمان حساك مبسوط بحياتنا ومش حاسة إن في حاجة نقصاك
مافيش أي ملل في حياتنا علشان نستعجل موضوع الاطفال دا
حاسة اننا محتاجين نكبر شوية .. ونتفاهم اكتر من كده
ونكتسب شوية خبرة تساعدنا نطلع اولاد صح
لكن الأهل مش ساكتين .. كلمة من هنا على كلمة من هنا والكل عايز
" الحفيد"
اضطرينا نعمل الخطوة اللي طول عمري بكرهها .. روحنا للدكاترة
وعدت علينا أيام كلها قلق كأننا مستنين نتيجة الثانوية العامة
وجات النتيجة ..

(( الأمل ضعيف جداً في إني اجيب اطفال بسبب القطط اللي زمان كنت بربيها ))

وانهرت .. انهرت لأني حسيت اني هتسبب في مشكلة بسبب اختياري اللي زمان اخترته
لمت نفسي كتير اوووووووووووى اني ما ضحتش زمان بحبي للقطط ودلوقتي انت كمان هتتحمل تبعات اختياري

وقررت ساعتها اقولك كلام عمري ما اتمنيت اقوله
قولته و اتمنيت من كل قلبي انك ترفض تنفذه
.. عرضت عليك تسرحني بإحسان وتشوف حياتك مع حد تاني .. ربنا العالم انا قد ايه كنت بندبح مع كل حرف من كلامي دا
وعدت علينا أيام كئيييييييييبة أوي لأنك زعلت مني جداً اني هان عليا اقولها
والحمد لله رفضت واصريت نكون مع بعض
وفضل الموضوع سر بيننا
لا أهلي ولا أهلك عرفوا
قولنا لهم ان كل الامور تمام بس لسة ربنا مش رايد
انت قولتلي ان دا لازم يتقال علشان ماحدش يحاول يفرق بيننا

وقعدت طيبت خاطري كتيييييييييييير اوي .. ودلعتني اكتر من الأول
وحبيتني أكتر من الأول .. وانا موتت فيك زي الأول واكتر
********



فاكر الأيام دي ؟؟
كل ما اشوف الولد ماجد اللي مغلبني دا افتكرها

كل ما اشوفك وانت بتحبه وبتلاعبه افتكرها
واقول يااااااااااه الحمد لله
قد ايه كنا محرومين من حاجة حلوة
وقد ايه انت حد قلبه كبيييييييييييير اوي وبيحبني علشان تقرر تضحي علشاني رغم حبك الكبير اوي للأطفال
عارف افتكرت الكلام دا ليه النهاردة كمان ؟؟
اسيبك تخمن ولا اقولك ؟؟
اقولك ولا اسيبك تخمن ؟؟
هسيبك تخمن علشان لما تعرف السبب صح هديك مكافأة
وانا بحب اكفأك
;)

Tuesday, March 24, 2009

بزعل منك ؟؟

بزعل منك ؟؟
اه بزعل منك .. بزعل منك قد ما بتزعل الأم من أحب ولادها ليها
وأول ما تشوف انكسار في عينه قدامها .. مجرد انكسار بتزعل من نفسها
بزعل منك على قد ما بتزعل البنوتة الصغيرة من باباها لأنه نزل الشغل الصبح من غير ما تبوسه زي كل يوم
بزعل منك عليك .. بزعل منك لو قررت تشيل الهم لوحدك
وتشاركني بس - من طيبة قلبك - في الضحكة والفرحة
بزعل منك لو لقيتك نسيتك وفكرت بس في اللي حواليك
أو جيت على نفسك و
وبصراحة بزعل منك لو عينك عدت - مجرد تعدي - على أي واحدة غيري
حتى لو كركبت وعجزت وكرمشت هفضل أزعل منك لو سمحت لعينك تشوف ضل واحدة تانية
بزعل منك بس زعلي بيختفي بمجرد ماالاقيك قدامي .. بصوتك .. بصورتك .. أو حتى بطيفك
وما بقدرش أزعل كتير قدام ضحكتك الحلوة
يارب يارب يارب ما يحرمني أبداً منك

Wednesday, March 11, 2009

قلبك أبيض أوي

يااااااااه قلبك أبيض أوي

كتيييييير أوي بزعلك وانت بطيبة قلبك بتسامح

وبتحبني .. وبتتعب علشاني

كتييييييير أوي اتعبك بجناني وعصبيتي وسوء ظني

وانت قصاد كل دا بردو بتحبني وبردو بتسامحني وبردو بتستحملني

ومش معايا أنا لوحدي لأ .. انت مع كل الناس

كتير أوي ناس يزعلوك ويعملوا فيك مواقف وحشة أوي

ويؤذوك بجد وانت زي ما انت .. بتسامح وبتضحك في وشوشهم و لو لقيتهم زعلانين تطبطب عليهم

يااااااااااااااه بجد انا عمري ما هلاقي زيك في الدنيا

وبجد بحبك اوي ونفسي ولادي يبقوا زيك

يبقى قلبهم زي قلبك أبيض زي الحليب وكبيييييير قد السما

Sunday, February 15, 2009

رقصة سلو


كل ما اسمع اغنية رقيقة وهادية اقعد اقول هنرقص على الأغنية دي سلو في فرحنا
وأقعد اتخيلك وانت بالبدلة وزي القمر .. مكسوف وفرحان وقلقان
وأتخيليني في فستان الفرح .. أميرة بجد لأني بقيت ملكك .. وأنا قلبي هيقف من الفرحة
ومش مصدقة إني بعد شوية هبقى معاك طول سنيني .. وكل لحظة في عمري .. وأقعد أفكر ..
هو أنا ياترى هبقى سامعة حاجة ؟!!
مأظنش .. أنا هبقى في دنيا تانية .. هبقى بس سامعة صوتك بيتردد في ودني
وانت بتقول : " وأنا قبلت زواجها على سنة الله ورسوله وأشهد أن اراعي فيها حدود الله و ..................... "
وهبقى بس سامعة صوتك يوم ما جيت تتقدم لي .. وانت بتكلم بابا .. وانت بتقوله " ياعمي " لأول مرة ..
صوت أول زغروطة رنت في ودني .. صوت بابا وهو بيسألني موافقة ولا لأ وانا قلب جوايا بيقول .. " هي محتاجة سؤال ؟ هو انا عمري اتمنيت غيره في الدنيا ؟ !! "
ولما المأذون يسألني موافقة ولا لأ .. يبقى على طرف لساني أقول له " وانا ازاي أصلاً اوافق أعيش من غيره ؟!! "
تفتكر وانا سامعة كل دا في ودني ، وحاسة بكل الفرحة دي ، هتفرق معايا الاغنية اللي برقص عليها سلو ؟؟؟؟؟؟؟

Sunday, January 11, 2009

حرم الاستاذ ( ............ )


زمان كان مافيش عندي أحب من أني الاقي حد يعرفني " أنا " .. وان حد يقدمنى كـ " أنا " .. مش بتهمني ألقاب ولا حاجة لكن
كل اللي بيهمني كينونتي .
لكن النهاردة لما زميل ليك كان بيقدمني لمراته وبيقولها : " حرم الاستاذ .......... " ياااااااااااااه انا ما حسيتش بحاجة بعدها
انا توهت في الكلمة ..
أنا حرمك .. أنا في حمايتك !! أنا منك .. حسيت إني فخووووووورة أوي بيك رغم إنك يعني مش أشهر من توم كروز ولا أغنى من بيل جيتس
لكن فخوووورة جداً بيك " انت " .. انت اللي اعرفه اكتر من أي حد في الدنيا
انت اللي عارفة قد ايه طيب ، وقد ايه نفسك تعمل حاجات كويسة اوي في الدنيا
وقد ايه قلبك مش بيقدر يشيل حقد ولا كراهية
قد ايه صريح ومش بتحب تكون منافق ولا مخادع
.. انت اللي حبيته ، وبجد جدير بالحب وجدير بإني أفخر إني انتمي ليك
ربنا ما يحرمني من وجودك في حياتي .. ولا يحرمك مني هههههه أكيد مش هتلاقي حد يحس بكل الأمان دا جنبك غيري .. دا طبعاً غير إن مافيش حد بتواضعي هههههههههه