Tuesday, June 30, 2009

بحاول اتعود ..

بحاول اتعود على حبك اللي في شكل أفعال وتصرفات مش كلام .. في شكل عطاء وما بتحاولش أبداً تقول بعمل كذا عشانك
حبك اللي مش مستني قصاده مقابل
بس بردو بحاول المح وسط مشاغلك وتعبك والمشاكل اللي حوالينا حبيبي اللي بيحبني بروقان
بحاول المح فيك حبيبي لما كان باله رايق ومش شايل هم
وبفضل انكشك بالكلام والهزار لحد ما اخليك تطلع الطفل اللي مخبيه من جواه
وأول ما المحه .. اهدى واتطمن
صدقني انا دلوقتي بحبك اضعاف اضعاف زمان
دلوقتي الذكريات الحلوة بيننا أكتر .. والأيام الاحلى اكتر
والحب كل يوم بيننا بيكبر
وحابة فيك تحملك للمسؤلية وتفكيرك في بكرة
بكرة بتاعنا .. وعارفة ان جزء كبير أوي من همك هو همي وهم بيتنا وأولادنا ..
لكن حبي ليك بيخليني اخلق ليك في خيالي صورة عاشق خرافي
بجمع بينك زمان ودلوقتي علشان احبك أكتر واكتر
صدقني انا بحبك في كل الحالات
بحبك وانت رومانسي ولما تكون عملي .. بحبك وانت خياي ووانت واقعي
بحبك وانت مشغول ووانت رايق بحبك لما تقولي بحبك وبحبك بردو لما تقولها بخوفك عليا

Friday, June 19, 2009

لما لقيتك

لما لقيتك عرفت يعني إيه " وحشتني " ويعني إيه

" محتاجة اشوفك " ويعني إيه " ب ح ب ك "

يعني إيه اتولد في كل مرة ابص فيها في عينيك

عرفت ازاي ممكن اكون مستعدة أدفع لك عمري بجد ..

عرفت ان الحب الحاجة الوحيدة اللي ممكن تخليني ادعي ربنا ياخد من عمري ويديلك ..

وادعي ربنا يخفف عنك ويبتليني .. ولو لازم حد فينا يتألم يبقى انا وهبقى مبسوطة

عرفت ازاي لما افرح انت اول حد يخطر في بالي ولما الدنيا تضيق في وشي انت تبقى البراح

فهمت ازاي الحب بيخلي العشاق مجانين وأطفال وكمان بيخليهم ز ي الأنبياء .. قلبهم ابيض وجواهم غفران وتسامح للكون كله

عرفت طعم ومعنى الدنيا والضحكة والفرحة والشوق والوحشة والوجع .. عرفت معنى الخوف والأمان

والحب اللي بجد

كل دا حصل لي لما لقيتك .. لأني عمري ما حبيت بجد إلا لما لقيتك

ربنا ما يحرمني منك

Saturday, June 13, 2009

الباشا تلميذ ;)

فرحت أوووووووووووي لما جيت تاخد رأيي في انك عايز تقدم في كلية الاعلام في الجامعة المفتوحة

فرحت لأسباب كتيرة .. أولها إنك هتحقق حلمك اللي من زمااااااان كان نفسك تحققه بس الظروف خليتك تروح في اتجاه تاني

وفرحت لأني حسيت الحاجات المشتركة بيننا بتزيد .. وفرحت كمان علشان دا هيخليني أعيش معاك احساس من زمان

نفسي أعيشه .. هحس اني مامتك كده وبخلي بالي من مذاكرتك ، وادخل عليك وانت سهران تذاكر ياعيني بسندويتشين

ونسكافيه ولا قهوة أو شاي .. وأقعد ادعيلك ..

وكمان لأني درست الحاجات دي قبلك فممكن أوي اساعدك في مذاكرتك .. يعني هحس بجد كأن ماجد نط في العمر

وبقى في الجامعة .

وآخر سبب بقى سبب - أعترف وأقر - إنه سبب شرير .. بصراحة هبقى فرحانة فيك وانا فاضية ومش ورايا

مذاكرة وانت بقى ياعينيييييييييييييي عندك امتحانات .. وارخم عليك بقى واقولك التليفزيون ممنوع لحد ما تخلص مذاكرة

هههههههههههه



Monday, June 8, 2009

هتطلقني ؟؟!!

من كام يوم وانا كل شوية تتحكي قدامي حكاية واحدة جوزها طلقها من كتر الغيرة
وشوفت فيلم عربي بتاع نجلاء فتحي وحسن يوسف النهاردة لما كانت نجلاء فتحي مبهدلاااااااااااااااه بالغيرة
وكملت بمكالمة في اسامة منير واحدة اتطلقت بعد جوازها بــ 6 شهور بسبب الغيرة
فحاسة انها رسايل ربنا بيبعتها لي علشان الم نفسي شوية وابطل اغير عليك بالشكل المرضي دا
و الله بحااااااااااااااااااول .. بحاول استعبط على نفسي واقنع نفسي ان الستات مش هتاكلك يعني
بس مش قادرة
بس سيبك من دا كله .. هو انت بجد ممكن تطلقني ؟؟
أياً كان السبب ممكن بعد ما روحنا طلعت علشان نتجوز ونعمل البيت دا نتطلق ؟؟
ببساطة كده !! المصيبة اني قريت في كتاب شكلها باظت لعمر طاهر ان الطلاق بالنسبة للاتنين المتجوزين عن حب
عبارة عن شكل جديد من اشكال الحب وممكن يحصل
انا مش متخيلة ان مهما حصل ممكن تفرط فيا
مش متخيلة انك بكل بساطة تقول لي انتي طالق
وكأنك بتقول لي ببساطة انا مش عايزك ولا عايز بيتنا ولا عايز مسك و ماجد ولا عايز اكمل عمري معاكي
وكمان مش عايز تبقى ليا في الجنة وبكل بساطة متصور انك تكوني مرات حد غيري وتعيشي معاه الاحلام اللي حلمناها سوا
بأحفادنا وببيتنا لما نعجز والحب اللي العالم كله هيحلف بيه
بجد مش متصورة ان دا ممكن يحصل
وعلشان كده كنت هصحيك من النوم اقولك انت ممكن تطلقني ؟؟
بس افتكرت .. انت مسافر في شغل ومش جنبي
فمسكت التليفون ولسة هطلبك بعدين افتكرت ان الساعة دلوقتي 3 الفجر
وافتكرت ان دا بالظبط اللي حصل للي اتطلقت بعد جوازها بــ 6 شهور
فلميت نفسي بصراحة :D