Monday, June 8, 2009

هتطلقني ؟؟!!

من كام يوم وانا كل شوية تتحكي قدامي حكاية واحدة جوزها طلقها من كتر الغيرة
وشوفت فيلم عربي بتاع نجلاء فتحي وحسن يوسف النهاردة لما كانت نجلاء فتحي مبهدلاااااااااااااااه بالغيرة
وكملت بمكالمة في اسامة منير واحدة اتطلقت بعد جوازها بــ 6 شهور بسبب الغيرة
فحاسة انها رسايل ربنا بيبعتها لي علشان الم نفسي شوية وابطل اغير عليك بالشكل المرضي دا
و الله بحااااااااااااااااااول .. بحاول استعبط على نفسي واقنع نفسي ان الستات مش هتاكلك يعني
بس مش قادرة
بس سيبك من دا كله .. هو انت بجد ممكن تطلقني ؟؟
أياً كان السبب ممكن بعد ما روحنا طلعت علشان نتجوز ونعمل البيت دا نتطلق ؟؟
ببساطة كده !! المصيبة اني قريت في كتاب شكلها باظت لعمر طاهر ان الطلاق بالنسبة للاتنين المتجوزين عن حب
عبارة عن شكل جديد من اشكال الحب وممكن يحصل
انا مش متخيلة ان مهما حصل ممكن تفرط فيا
مش متخيلة انك بكل بساطة تقول لي انتي طالق
وكأنك بتقول لي ببساطة انا مش عايزك ولا عايز بيتنا ولا عايز مسك و ماجد ولا عايز اكمل عمري معاكي
وكمان مش عايز تبقى ليا في الجنة وبكل بساطة متصور انك تكوني مرات حد غيري وتعيشي معاه الاحلام اللي حلمناها سوا
بأحفادنا وببيتنا لما نعجز والحب اللي العالم كله هيحلف بيه
بجد مش متصورة ان دا ممكن يحصل
وعلشان كده كنت هصحيك من النوم اقولك انت ممكن تطلقني ؟؟
بس افتكرت .. انت مسافر في شغل ومش جنبي
فمسكت التليفون ولسة هطلبك بعدين افتكرت ان الساعة دلوقتي 3 الفجر
وافتكرت ان دا بالظبط اللي حصل للي اتطلقت بعد جوازها بــ 6 شهور
فلميت نفسي بصراحة :D

4 comments:

مامة مازن said...

سارة يا سارة يااللى كل كلمة منك سارة ومبهجة
عيطتينى وبعدين ضحكتينى الحمد لله ان العيال نامو كانو قالو فى ايه يا ماما خير مالك بتضحكى وبتعيطى وخاصة ميرو الاروبة دى
يا سارة بتمنالك بجد احلى دنيا واتمنى لكى عريس ابن حلال شهم ومؤدب ومتربى وعنده دين واخلاق علشان يحافظ عليكى وعلى رقتك وحنانك ما هو انتى لا يمكن تكونى عكس كلامك ابدا
بجد ربنا يوفقك بس تحبيه يكون شبه مين
عندى ليكى عريس امور وحليوة وطيب بس شقى شوية وعنده اربع سنين الا شهرين ينفع

Rehab said...

السلام عليكم
تدوينة جميلة
أكتر جزء عجبنى أما قلتى ان الطلاق بين اتنين جمعهم الحب بيبقى عن حب..فكرتينى برواية توفيق الحكيم "الخروج من الجنة"...
متابعة بود
تحياتى

سارة درويش said...

هههههههههههههههههههههه مامة مازن مية مية العريس دا لقطة على الأقل احقق حلمي واتجوز بعد ما ابقى رئيسة تحرير ههههههههه
ربنا يبارك لك فيه يارب وادعيلى ربنا يرزقني بالانسان اللي اتمناه

سارة درويش said...

رحاب .. انا استغربتها اول لما قريتها في كتاب عمر طاهر بصراحة انا في رأيي الطلاق بين اتنين بينهم حب يعني رعب .. بجد هيبقى شرخ كبير أوي بينهم ما اظنش اي زمن يقدر يصلحه
نورتيني يا جميلة