Sunday, September 18, 2011

شعرة بيضا !


النهاردة الصبح اكتشفت إن الفضة زارت ليل شعري ، شوفتها في المراية وأنا بَسَرحه ، ما اتفزعتش زي  كل الستات لما شوفت شعرة بيضا ، بالعكس ابتسمت .. يمكن لأني لمحتك في نفس البرواز ورايا بتظبط هدومك علشان تروح الشغل :)
فرحت أوي .. أنا عِشت معاك لحد ما شعري بقى أبيض :) أي نعم مش كله يعني .. بس يوم ولا التاني وهلاقي شعري كله أبيض :)
يوم ورا يومين ورا كام شهر وهنبقى عواجيز .. مع بعض .. زي ما طول عمرنا اتمنينا 
إننا نكون مع بعض .. يوم ما حد فينا يكون محتاج يتسند على حد يلقى التاني عكازه .
انت لمحتني وانا ثابتة قدام المراية وببتسم ، فجيت تبص في ايه .. شوفتها .. لمحت في عينك نفس الفرحة :) وعرفت إن نفس الفكرة خطرت في بالك ..
لكن فجأة نطت غيرتي عليك في الصورة من تاني ، قولتلك يا حلاوة اشمعنى انا شعري ابيض وانت لأ ؟ دا معناه إني هعجز قبلك وانك هتتعاكس ؟
أصرررررريت إني أدور في شعرك على شعراية بيضا .. يابنتي يهديكي يرضيكي .. لأ لاااااازم الاقي شعراية بيضا
هتأخر ع الشغل يا سارة 
-مااااااليش دعوة لازم الاقي شعراية بيضا !
قولتلي أنا عندي حل حلو جداً وسريع جداً :) 
مديت إيدك بالراحة لشعري وأخدت شعرايتي البيضا من غير ما احس ، وابتسمت وقولت لي بس يا ستي 
مافيش داعي تدوري عندي على شعراية بيضا .. دلوقتي كل شعرك اسود مافيش عندك شعر ابيض
ضحكت وقولت لك ماااااااشي هعديهالك المرة دي :)

*******

بالليل طلبت مني اخد فلوس من محفظتك علشان احاسب بيها المكوجي ، فتحت المحفظة لقيتك محتفظ بشعرايتي البيضا في المحفظة في ورقة وكاتب عليها التاريخ :) فِرحت أوي.
بس بردو .. استنيتك لما نمت وقعدت ادور في شعرك على شعراية بيضا 

..وأخيراااااااااااااااااً .. الساعة 2 بالليل لقيت 3 :))))