Sunday, September 18, 2011

شعرة بيضا !


النهاردة الصبح اكتشفت إن الفضة زارت ليل شعري ، شوفتها في المراية وأنا بَسَرحه ، ما اتفزعتش زي  كل الستات لما شوفت شعرة بيضا ، بالعكس ابتسمت .. يمكن لأني لمحتك في نفس البرواز ورايا بتظبط هدومك علشان تروح الشغل :)
فرحت أوي .. أنا عِشت معاك لحد ما شعري بقى أبيض :) أي نعم مش كله يعني .. بس يوم ولا التاني وهلاقي شعري كله أبيض :)
يوم ورا يومين ورا كام شهر وهنبقى عواجيز .. مع بعض .. زي ما طول عمرنا اتمنينا 
إننا نكون مع بعض .. يوم ما حد فينا يكون محتاج يتسند على حد يلقى التاني عكازه .
انت لمحتني وانا ثابتة قدام المراية وببتسم ، فجيت تبص في ايه .. شوفتها .. لمحت في عينك نفس الفرحة :) وعرفت إن نفس الفكرة خطرت في بالك ..
لكن فجأة نطت غيرتي عليك في الصورة من تاني ، قولتلك يا حلاوة اشمعنى انا شعري ابيض وانت لأ ؟ دا معناه إني هعجز قبلك وانك هتتعاكس ؟
أصرررررريت إني أدور في شعرك على شعراية بيضا .. يابنتي يهديكي يرضيكي .. لأ لاااااازم الاقي شعراية بيضا
هتأخر ع الشغل يا سارة 
-مااااااليش دعوة لازم الاقي شعراية بيضا !
قولتلي أنا عندي حل حلو جداً وسريع جداً :) 
مديت إيدك بالراحة لشعري وأخدت شعرايتي البيضا من غير ما احس ، وابتسمت وقولت لي بس يا ستي 
مافيش داعي تدوري عندي على شعراية بيضا .. دلوقتي كل شعرك اسود مافيش عندك شعر ابيض
ضحكت وقولت لك ماااااااشي هعديهالك المرة دي :)

*******

بالليل طلبت مني اخد فلوس من محفظتك علشان احاسب بيها المكوجي ، فتحت المحفظة لقيتك محتفظ بشعرايتي البيضا في المحفظة في ورقة وكاتب عليها التاريخ :) فِرحت أوي.
بس بردو .. استنيتك لما نمت وقعدت ادور في شعرك على شعراية بيضا 

..وأخيراااااااااااااااااً .. الساعة 2 بالليل لقيت 3 :))))



17 comments:

مدونة رحلة حياه said...

السلام عليكم
ايه كل المعاناة دى
ربنا يمتعكم بحبكم وحياتكم كمان وكمان
دومتم بخير

ali elbanna said...

كالعادة دائما تعجبني كلماتك وتسعدني

ali elbanna said...

ننتظر جديدك الذي دائما يعجبنا ويسعدنا

Anonymous said...

حلوة اويززودحكتني جدا حتة لما لقيتي 3 شعرايات بيض الساعة 2 بليل ..كلامك حلوة اوي وسهل اي حد يقراه و يفهمه وبسيط
تسلم ايدك

Anonymous said...

اية الرومانسية دى يا سارة معاناها حلو اوى

Ramy said...

أزيك يا أميرة سارة

(:

متنزلى جزء تانى من الكتاب

على فكرة كل اللى قرا الكتاب منى عجبه جداً

(:

سلامنا لمنى كتير

sony2000 said...

يالله
بجد خليتيني أبكي

ربنا يحفظكوا بلبعض يارب
اللهم امين

aya mohamed said...

تحفة بجد جميلة قوووي يا سارة بجد كلماتك دية بحس انها بتعيشني حالة جميلة وبروح بيها لدنيا تانية

reemaas said...

روعه ياسارة روعه بجد
يابنى اقرى المعوذتين انا خايفه احسدك والله
ماشاء الله

Madamedo Abd Elnaby said...

هههههههههههههههههههه ... جميــــــــــــــــــلة أوي يا سارة وشقية زي ما عودتينا ... بس زوجك اللي في الرواية دة مثالي جدا ... كم أتمني ان برزقني الله بنصيب مثله :)

Madamedo Abd Elnaby said...

ههههههههههههههه ... جميـــــــــلة أوي يا سارة وشقية زي ما عودتينا ... بس زوجك اللي في الرواية دة مثالي أوي ... هو في حد كدة ؟؟!... كم أتمني ان يرزفني الله بنصيب مثله

فانداليسيا said...

هههههههههههههههههههههههههههههههههههه
صباحو خيال رومانسى طاغى :D

يارب يبقى حقيقة وكل ايامك تبقى حب وعشرة طيبة
وبعدين بنات وولاد كتير عندهم شعر ابيض من غير ما يعجزوا :D

ممكن ياخدها بشعرة بيضا عادى يعنى :P

HeBota said...

الاروع فيها هو التبادل الفكرى
احساسكم المشترك
وحبكم الباقى ييلأبد
دمتى مبدعة

مامة مازن said...

الكتاب ده جميل جدا وانا شايفة انه باذن الله انتى عندك كتير جدا وهتقدمى احلى منه بكتير رغم جماله ورقته الشديدة لكن عندك احلى واحلى واحلى

صراحة لم اشتريه لانى ملقتوش فى بنها فنزلته اون لاين وميرسى قوى ع اللينك

وائل ابراهيم said...

دى تحفه بجد ساره مع انها دمها خفيف

بس فيها حب جميل واخلاص ووفاء اجمل

ربنا يسعدك ويوفقك يارب

وعلى فكره انا قريتها لصديقتى وفضلت تضحك كتير اوى

آه وكفى said...

ههههههههههههههههه و ربنا انتي عسل و ضحكتيني في عز منا عيني وارمة عياط .. ربنا يخليكم لبعض :)

amira Mero said...

والله الكتاب تحفه تحفه تحفه وانا بقراه اتمنيت انى ما اخلصو بتوفييييييييق استمرى